धाराशिव जिल्ह्यातील सर्व ८ तालुक्यांना दुष्काळाचा ‘पहिला ट्रिगर’ लागू परंडा, भूम, वाशी, कळंबसह जिल्ह्यातील सर्व तालुके यादीत; जमीन महसूल सूट, पीक कर्ज पुनर्गठन, वीजबिल सवलतीसह विविध उपाययोजना लागू . The ‘first trigger’ for drought has been invoked for all eight talukas in Dharashiv district.

धाराशिव जिल्ह्यातील सर्व ८ तालुक्यांना दुष्काळाचा ‘पहिला ट्रिगर’ लागू

परंडा, भूम, वाशी, कळंबसह जिल्ह्यातील सर्व तालुके यादीत; जमीन महसूल सूट, पीक कर्ज पुनर्गठन, वीजबिल सवलतीसह विविध उपाययोजना लागू

The ‘first trigger’ for drought has been invoked for all eight talukas in Dharashiv district.

परंडा, दि. २६ (रंगोली न्यूज) : The ‘first trigger’ for drought has been invoked for all eight talukas in Dharashiv district. खरीप हंगाम २०२६ मधील पावसाची स्थिती, पिकांची अवस्था आणि इतर निकषांच्या आधारे महाराष्ट्र शासनाने राज्यातील २६५ तालुक्यांमध्ये दुष्काळाचा पहिला ट्रिगर (Trigger-१) लागू केला आहे. यामध्ये धाराशिव जिल्ह्यातील सर्व ८ तालुक्यांचा समावेश करण्यात आला आहे. त्यामुळे जिल्ह्यातील शेतकऱ्यांना शासनाने जाहीर केलेल्या विविध सवलती व दुष्काळ निवारणाच्या उपाययोजनांचा लाभ मिळण्याचा मार्ग मोकळा झाला आहे.

मदत व पुनर्वसन विभागाने २५ सप्टेंबर २०२६ रोजी यासंदर्भात शासन निर्णय जारी केला आहे. कृषी आयुक्तांच्या अहवालाच्या आधारे खरीप हंगामातील परिस्थितीचे मूल्यांकन करण्यात आले. त्यानुसार राज्यातील २६५ तालुक्यांमध्ये दुष्काळाची परिस्थिती असल्याचे निदर्शनास आल्याने या तालुक्यांमध्ये Trigger-१ लागू करण्याचा निर्णय घेण्यात आला आहे.

धाराशिव जिल्ह्यातील सर्व ८ तालुके दुष्काळाच्या यादीत

शासन निर्णयाच्या परिशिष्टामध्ये धाराशिव जिल्ह्यातील पुढील ८ तालुक्यांचा समावेश करण्यात आला आहे.

१) धाराशिव, २) कळंब, ३) भूम, ४) वाशी, ५) तुळजापूर, ६) लोहारा, ७) परंडा, ८) उमरगा

म्हणजेच धाराशिव जिल्ह्यातील एकही तालुका Trigger-१ च्या यादीबाहेर राहिलेला नाही. जिल्ह्यातील सर्व तालुक्यांचा समावेश झाल्याने खरीप हंगामातील प्रतिकूल परिस्थितीचा सामना करणाऱ्या शेतकऱ्यांना शासनाच्या विविध उपाययोजनांचा लाभ मिळणार आहे.

शेतकऱ्यांसाठी १२ प्रमुख उपाययोजना

Trigger-१ लागू झालेल्या २६५ तालुक्यांसाठी शासनाने विविध सवलती आणि उपाययोजना लागू करण्याचा निर्णय घेतला आहे. त्यामध्ये प्रमुख उपाययोजना पुढीलप्रमाणे आहेत—

१. जमीन महसुलात सूट.

२. पीक कर्जाचे पुनर्गठन.

३. शेतीशी निगडित कर्जाच्या वसुलीस स्थगिती.

४. कृषी पंपांच्या चालू वीजबिलात सवलत. १० अश्वशक्तीपर्यंत क्षमतेच्या कृषी पंपांचे वीजबिल अगोदरच माफ करण्यात आले असून, त्यावरील वीजपंपांना सदर सूट लागू असेल.

५. शालेय व महाविद्यालयीन विद्यार्थ्यांच्या परीक्षा शुल्कात माफी.

६. रोजगार हमी योजनेअंतर्गत कामांच्या निकषात शिथिलता करून जास्तीत जास्त कामे सुरू करणे.

७. आवश्यकतेनुसार टँकरद्वारे पिण्याच्या पाण्याचा पुरवठा.

८. टंचाई जाहीर झालेल्या गावांतील शेतकऱ्यांच्या कृषी पंपांची वीजजोडणी खंडित न करणे.

९. शेतीवर अवलंबून शेतकरी व शेतमजुरांना अन्नधान्याची टंचाई भासू नये यासाठी व्यवस्था करणे.

१०. जनावरांना आवश्यक चारा उपलब्ध करून देण्याची व्यवस्था.

११. जलसंधारणाची कामे सुरू करणे.

१२. पिण्याचे पाणी तसेच जनावरांच्या पाण्याचे नियोजन करणे.

या उपाययोजनांमुळे दुष्काळी परिस्थितीचा सामना करणाऱ्या शेतकरी, शेतमजूर, विद्यार्थी आणि ग्रामीण भागातील नागरिकांना विविध प्रकारे दिलासा मिळण्याची शक्यता आहे.

पंचनाम्याची कार्यवाही तातडीने

शासन निर्णयानुसार Trigger-१ लागू झालेल्या २६५ तालुक्यांमध्ये पिकांच्या नुकसानीची पंचनामे प्रक्रिया तातडीने सुरू करण्याचे निर्देश देण्यात आले आहेत. सर्वेक्षण करण्यात आलेल्या क्षेत्रातील पिकांची सद्यस्थिती दर्शविणारे छायाचित्र आणि जीपीएस कोऑर्डिनेट संकलित करून पिकांच्या परिस्थितीचा अहवाल कृषी आयुक्तांमार्फत शासनास सादर करण्याची कार्यवाही करण्यात येणार आहे.

धाराशिव जिल्ह्यातील सर्व ८ तालुके Trigger-१ मध्ये समाविष्ट झाल्याने जिल्ह्यातील खरीप पिकांची स्थिती, नुकसानीचे पंचनामे आणि त्यानंतरच्या मदतीच्या प्रक्रियेकडे शेतकऱ्यांचे लक्ष लागले आहे.

पीक नुकसानीच्या आर्थिक मदतीबाबत स्वतंत्र निर्णय

दरम्यान, Trigger-१ लागू करण्याच्या या शासन निर्णयात विविध दुष्काळी सवलती व उपाययोजनांचा समावेश करण्यात आला असला, तरी पीक नुकसानीबाबतची आर्थिक मदत स्वतंत्र शासन निर्णयान्वये जाहीर केली जाणार आहे. त्यासाठी विहित कार्यपद्धतीनुसार पिकांच्या नुकसानीचे पंचनामे आणि आवश्यक अहवाल पूर्ण करणे महत्त्वाचे ठरणार आहे.

धाराशिव जिल्ह्यातील शेतकऱ्यांना दिलासा

धाराशिव जिल्ह्यातील ८ पैकी ८ तालुके Trigger-१ मध्ये समाविष्ट झाल्याने परंडा, भूम, वाशी, कळंब, तुळजापूर, लोहारा, उमरगा आणि धाराशिव तालुक्यातील शेतकऱ्यांना शासनाच्या दुष्काळी उपाययोजनांचा लाभ मिळण्याचा मार्ग खुला झाला आहे.

राज्यात २६५ तालुके दुष्काळाच्या पहिल्या ट्रिगरमध्ये; धाराशिव जिल्ह्यातील ८ पैकी ८ तालुके यादीत असल्याने आता पंचनामे आणि पुढील मदतीच्या निर्णयाकडे शेतकऱ्यांचे लक्ष लागले आहे.

आपल्या परिसरातील बातम्या व इतर घडामोडी 🤳पहाण्यासाठी हक्काच "रंगोली न्युज" डिजीटल मिडीया वेब पोर्टल.

👉 रंगोली News 👉 www.rangolinews1.com या संकेतस्थळाला भेट द्या!