श्री शिवाजी महाविद्यालयात ‘फ्रेशर्स पार्टी’ उत्साहात. नवीन विद्यार्थ्यांचे जल्लोषात स्वागत; करिअर, आरोग्य आणि संस्कार जपण्याचा मान्यवरांचा संदेश. New students welcomed with great enthusiasm; dignitaries urge them to focus on their careers and health while upholding values.

श्री शिवाजी महाविद्यालयात ‘फ्रेशर्स पार्टी’ उत्साहात

नवीन विद्यार्थ्यांचे जल्लोषात स्वागत; करिअर, आरोग्य आणि संस्कार जपण्याचा मान्यवरांचा संदेश

New students welcomed with great enthusiasm; dignitaries urge them to focus on their careers and health while upholding values.

परंडा, दि. २८ (रंगोली न्यूज) : New students welcomed with great enthusiasm; dignitaries urge them to focus on their careers and health while upholding values.
येथील श्री शिवाजी महाविद्यालयात नवीन प्रवेशित विद्यार्थ्यांचे स्वागत करण्यासाठी ‘फ्रेशर्स पार्टी’चे आयोजन उत्साही आणि खेळीमेळीच्या वातावरणात करण्यात आले. विविध मनोरंजक खेळ, स्पर्धा आणि मनोगतांच्या माध्यमातून नव्या विद्यार्थ्यांना महाविद्यालयीन जीवनाची आनंददायी सुरुवात करून देण्यात आली.

कार्यक्रमाच्या अध्यक्षस्थानी महाविद्यालयाचे संस्थापक अध्यक्ष गोरख मोरजकर होते. संस्थेच्या सचिव आशाताई मोरजकर प्रमुख पाहुण्या म्हणून उपस्थित होत्या. यावेळी महाविद्यालयाचे प्राचार्य डॉ. तुकाराम लोखंडे तसेच प्रा. शक्तीराज माने यांची प्रमुख उपस्थिती होती.

कार्यक्रमाची सुरुवात बी.एस्सी. (सीएस) तृतीय वर्षातील विद्यार्थिनी मोहिनी उंबरे हिच्या प्रास्ताविकाने झाली. तिने महाविद्यालयाची शैक्षणिक व सांस्कृतिक परंपरा तसेच नवीन विद्यार्थ्यांच्या स्वागत समारंभामागील उद्देश स्पष्ट केला.

करिअरसह आरोग्य आणि संस्कारांनाही महत्त्व द्या

प्रमुख पाहुण्या आशाताई मोरजकर यांनी विद्यार्थ्यांना मार्गदर्शन करताना महाविद्यालयीन जीवनात करिअरकडे गांभीर्याने पाहण्याचे आवाहन केले. आजच्या स्पर्धात्मक आणि धकाधकीच्या युगात शिक्षण व करिअरसोबतच स्वतःच्या आरोग्याची आणि तब्येतीची काळजी घेणेही तितकेच आवश्यक असल्याचे त्यांनी सांगितले.

यशाच्या शिखरावर पोहोचल्यानंतरही आई-वडिलांनी दिलेले संस्कार विद्यार्थ्यांनी सदैव जपावेत, असा संदेश त्यांनी दिला. शिक्षणातून केवळ नोकरी किंवा करिअर नव्हे, तर चांगले व्यक्तिमत्त्व घडविण्यावरही विद्यार्थ्यांनी भर द्यावा, असे त्यांनी नमूद केले.

‘महाविद्यालयीन जीवन हा आयुष्यातील सुवर्णकाळ’

प्राचार्य डॉ. तुकाराम लोखंडे यांनी विद्यार्थ्यांना मार्गदर्शन करताना महाविद्यालयीन जीवन हा आयुष्यातील सुवर्णकाळ असल्याचे सांगितले. या काळाचा आनंद घेत असतानाच अभ्यास, ज्ञानसाधना आणि व्यक्तिमत्त्व विकास याकडेही विद्यार्थ्यांनी गांभीर्याने लक्ष द्यावे, असे त्यांनी स्पष्ट केले.

प्रा. शक्तीराज माने यांनी नवीन प्रवेशित विद्यार्थ्यांचे मनःपूर्वक स्वागत करून त्यांच्या पुढील शैक्षणिक वाटचालीस शुभेच्छा दिल्या.

‘जिजाऊ-सावित्रीच्या लेकी’ आणि ‘शिवबांचे छावे’

अध्यक्षीय समारोपात संस्थेचे संस्थापक अध्यक्ष शिवश्री गोरख मोरजकर यांनी विद्यार्थिनींचा ‘जिजाऊ-सावित्रीच्या लेकी’ तर विद्यार्थ्यांचा ‘शिवबांचे छावे’ असा गौरवपूर्ण उल्लेख केला.

विद्यार्थ्यांनी समाजात वावरताना केवळ बाह्य रूप किंवा दिसण्यावर लक्ष केंद्रित न करता स्वतःचे अस्तित्व, व्यक्तिमत्त्व आणि कर्तृत्व घडविण्यावर भर द्यावा, असे त्यांनी सांगितले. “आजच्या काळात दिसण्याइतकेच आपले असणेही महत्त्वाचे आहे,” असे त्यांनी नमूद केले. थोर महापुरुषांचा आदर्श डोळ्यांसमोर ठेवून विद्यार्थ्यांनी आरोग्य सुदृढ राखत स्वतःची प्रगती साधावी, असे आवाहनही त्यांनी केले.

विविध खेळ व स्पर्धांनी रंगली फ्रेशर्स पार्टी

फ्रेशर्स पार्टीदरम्यान नवीन प्रवेशित विद्यार्थ्यांसाठी विविध मनोरंजक खेळ आणि स्पर्धांचे आयोजन करण्यात आले होते. विद्यार्थ्यांनी उत्स्फूर्त सहभाग घेत कार्यक्रमाचा आनंद लुटला. नवीन प्रवेशित विद्यार्थिनी सानिका शिंदे आणि प्रणिती काळे (बी.एस्सी. सीएस) यांनी महाविद्यालयात प्रवेश घेतल्यानंतरचा अनुभव व्यक्त करत मनोगत मांडले.

कार्यक्रमाचे सूत्रसंचालन बी.एस्सी. (सीएस) तृतीय वर्षातील विद्यार्थिनी अंकिता गटकुळ व अश्विनी लोकरे यांनी केले. विद्यार्थ्यांच्या वतीने बी.एस्सी. (सीएस) द्वितीय वर्षातील विद्यार्थिनी वैष्णवी गोडगे हिने आभार मानले. शेवटी प्रा. तिपाले राजश्री यांनी औपचारिक आभार व्यक्त केले.

कार्यक्रमास महाविद्यालयातील सर्व विद्यार्थी-विद्यार्थिनी तसेच प्राध्यापकवृंद मोठ्या संख्येने उपस्थित होते. उत्साहपूर्ण वातावरणात झालेल्या या फ्रेशर्स पार्टीमुळे नवीन विद्यार्थ्यांना महाविद्यालयीन जीवनाशी परिचित होण्यासोबतच जुन्या व नव्या विद्यार्थ्यांमध्ये स्नेहाचे आणि आपुलकीचे वातावरण निर्माण झाले.

आपल्या परिसरातील बातम्या व इतर घडामोडी 🤳पहाण्यासाठी हक्काच "रंगोली न्युज" डिजीटल मिडीया वेब पोर्टल.

👉 रंगोली News 👉 www.rangolinews1.com या संकेतस्थळाला भेट द्या!